Шингил барг урар қурти (Lobesia botrana) 

Шингил барг урар қурти (Lobesia botrana) – Бу зараркунанда ток туплари жуда зич жойлашган, қуёш нурлари яхши тушмайдиган токзорларда кўп учрайди ва йилига 4 мартта авлод беради. Капалак қанотлари ёзилгандаги катталиги 13 мм бўлиб, олдинги қанотлари эса сариғиш яшил-қўнғир тусда, уларнинг устидан иккита кўндаланг чизиқ ўтганлигини кўришимиз мумкин. Қуртлари токнинг тўпгул, тугунча ва мевалари билан озиқланади. Ўсиб етилган қуртнинг танаси 12 мм, хира яшил тусда, боши оч қўнғир рангли бўлади. Токнинг узум бошлари ғуж жойлашадиган навларида қурт шикастлаган узумлар ёз ўртасида чирийди ва чириш натижасида узум бошининг ҳамма қисмига ёйилади. Зараркунанда кўчаётган пўстлоқ тагида, баъзан қуриган барглар орасида оқ пиллага ўралган ғумбак ҳолатида қишлайди. Об-ҳаво иқлим шароитига қараб, апрел ёки май бошида ғумбаклардан капалаклар учиб чиқа бошлайди ва токнинг соя жойларидаги тўпгул ғунчаларига тухум қўяди. Кейинги бўғин капалаклар тухумларини тугунчаларга, пишиқ етилаётган узумларга, ток барги ва шохларга битта-биттадан жойлайди. Ривожланиш даврида ҳар бир қурт 5-10 та узум ғужумини шкастлайди. Учинчи бўғин қуртлар август, тўртинчи бўғин қуртлар сентябрда пайдо бўлади. Бу қуртлар пишиқ етилаётган узумларнинг ичига ўтади ва уруғига тегмасдан фақат эти билан озиқланади. Учинчи ва тўртинчи бўғин қуртлар ўргимчак иплари билан бир-бирига бириктириб қўяди. Об-ҳаво шароитига қараб қуртларнинг ривожланиш даври 16-24 кун давом этади. (Болтаев Б. С, Камилов Ш. Г. 2013 йил). (Расм).

Ҳозирги вақтда шингил барг урар қурти учун феромон тўтқичлардан кенг фойдаланилиб келинмоқда. Зараркунандаларни мониторинг қилишда 1 гектар майдонга 1-4 дона, зараркунанда қайд этилмаган майдонларда 100 гектарга 1 дона, зараркунанда кенг тарқалган майдонларга гектарига 5-50 дона тўтқичлардан қўллаш мумкин.